يا يمه منتهي جيتك وكلي مرتجي غفران

يا يمه منتهي جيتك وطالب منك الغفران
اقبّـل قاعة اقدامك واغسلها بدمعاتي
يا يمه كل مافيني ينادي لك انا ندمان
طلبتك .. قولي سامحتك وردي لوجهي بسماتي
انا ادري قلبك الطيب كسرته بصدمة النكران
غلطت وغلطتي هذي تعيّـر كل غلطاتي
اشوف الشيب يا يمه ترى ماجاء وانا فرحان
وربي الي رفع ذاتك ونزل للردى ذاتي
فقدت الراحة من بعدك فقدت الطيبة والتحنان
بدونك راحتي غاية بيدينك هذي راحاتي
انا بعدك ولا حاجة انا بعدك ترى عميان
اشوف ولا اشوف الي يوريني مساراتي
انا وسيد الشقى والهم من بعدك غدينا اخوان
يجيب هموم هالعالم ويرميها بمتاهاتي
مثل ماهنتي يايمه عليهم قلبي يمه هان
رموني ومابهم فزعة وانا الدمعات فزعاتي
يا يمه لاتظنيني انا من فعلهم زعلان
انا ادري فيك مشتاقه وهمك بس ملاقاتي
يا يمه حيل ضميني ابي ارتاح انا تعبان
تعبت اهرب من ذنوبي ابي ارتاح بمسافاتي
ابي اسمع منك اي كلمة لصوتك مسمعي ولهان
ابسمع يمه وبصوتك اباذكرفيها نشواتي
اشوفك ساكته يمه ! غفيتي والا انا غلطان
غفيتي يابعد عمري .. تعبتي من مواساتي ؟
يا يمه طالبك قومي ينادني عيونك شان
اشوف الموت بعيونك عساها تصير هقواتي
تعالو يابشر شوفو انا محتار انا تلفان
انا أمي مدري وش فيها انا مدري انا احاتي
شنو أمي انا ماتت !؟ لا لا لا ترى غلطان
انا أمي ماتخليني على حزني ووناتي
انا أمي قلبها طيب ولا يمكن تبكي انسان
انا أمي ماتبكيني ولا تتمنى آهاتي
يا يمه صح مامتي ؟ صح الموت توماحان
اذا متي انا بعدك ابقضي وين ساعاتي؟
يا يمه قومي يا يمه وقولي الموت مهما كان
انا جيتك وانا ناوي ابمشي فيك جناتي
تركتيني ومتي ليه ؟ تركتيني وانا ضميان
ولا مسموح ياوليدي ولا اخذ عنك زعلاتي
انا جاني وانا المجني وانا المخطي وانا الندمان
وانا ديني رميته تيه وبعثرته ملفاتي
وجيت من الهناء مفلس وقلبي من الضنى خسران
تركتيني على ناري اعدد فيك زلاتي
ولاني مرضي ربي ولاني تابع الشيطان
انا بعدك ترى مابين نهاياتي وبداياتي
يا يمه منتهي جيتك وكلي مرتجي غفران
وشفت الناس تلعني وتحذرني من الاتي