ثلاث سنين انا اخطط لهذا اليوم

ثلاث سنين انا اخطط لهذا اليوم يابو سعود
تيسر حالي وجاهز اوَفي وعدي بوقته
وفجأة جتني تعتذر..تقول تأخرت الوعود
وانا مستغرب واسمع كأني وعدها خنته !!
حسبت انها تمازحني وتتصنع جفا وصدود
ضحكت بوجهها من قلب..مع انها بايخه النكته
وقالت إرضى بالواقع..قلبي ماهو المعهود
تغير كل شي صوبك..نصيبي ماأظن انته !!
كنت فـ يوم محبوبي ولكن ماأظن نعود
وصل من قبل ماتوصل..وانا ذاك الصبر عفته
ولكن تكفى صدقني ويشهد ربي المعبود
ترى ماخنتك بغفله..ولاكلمته ولاشفته
صراحه أهلي قالوا لي بأنه ولد أصل وجود
وجتني امَه بالصوره..وبكلمات المدح أخته
سكت وقلت هي فرصه مدام الجود في الموجود
وقالوا كل من حولي علامات الرضا سكته
وانا فكرت دام امَه واخته ماعليهم زود
اكيد اني براضيهم اذا وافقت واخترته
واراضي اهلي واخواني مدام ان الفرح مقصود
عطيت الناس انا كلمه ومعاهم وقتي حددته
ولا أقدر اغيرها..ترى عند العرب منقود
اوافق واعتذر باكر واقول الراي غيرته !
تبي تشرح لي المنقود..تصدق عاد يابو سعود ؟
تبيني اقتنع وارضى بحالٍ عمري ماعشته
انا ماني بقايلها..عسى يفرش ثراها ورود
بعد ما حطمت قلبي وطعم الموت جربته
عسى بفستانها اشواك..وفي ثوبه عقارب سود
ونارٍ تحرق الكوشه وتحرق بيتهم حتى
وموت بليلة الدخله يبرد حرتي ياكود
ولا احس انها بحضنه يلامس خدَ لامسته
عليَ أهون إذا ماتوا ولابنفس السرير رقود
ترى صعبٍ عليَ اتخيل اللي ماتخيلته
عسى قاع الثرى يقسى ويتحوَل صخر جلمود
وحفَار القبر يرفض يسوي فوق مقدرته
ترى دفنه عديم الذات تلوَع حتى كبد الدود
ومن خان العهود ومات تعافه حتى مقبرته
عسى ربي يجازيهم بحبلٍ من مسد ممدود
يعلقهم من أطرافه وفوقه نارٍ وتحته
انا ماني حقود وشين ولاني من نسل نمرود
ومن حط نفسه بوضعي بيقول اللي انا قلته
مدام الفعل له ردة فعل والله ابشري بردود
بدعي دامني حيٍ وبغرس للدعا نبته
وبسقيها نزيف القلب ودمعٍ مارحم لخدود
وتكبر والثمر ثاري من اللي خانني وصنته
انا نذرٍ عليَ اكتب وافجَر هالقصيد رعود
واسمَع كل بشر صوتي عجبته ولا زعلته
واردد للي يسمعني..اذا حبيت (حط حدود )
انا حبيت دون حدود وشوف اللي تكبدته
ثلاث سنين انا ابني وجت (صوره) بكل برود
خذت مني شقى عمري وحلمٍ (قلت حققته) !!!
ثلاث سنين انا اخطط لهذا اليوم يابو سعود
وتوافق من كلام اخته..وصوره (أربعه في سته )

للشاعر ساقي الشوق

ما شاء الله على هذا الأداء الرائع والفعال وفقك الله

» @@@ امنيتك لهذا اليوم @@@
» هل من متذوق لهذا الجمال؟
» لوحة المتميزون لهذا الأسبوع
» سنين العمر تندثر
» نضحك مره ونحزن سنين ؟؟؟